Matriekslaagsyfer

BOODSKAP VAN HOOF VIR 2025

​

Om ‘n Hansie te wees, is om deel te wees – want Hansies is meer as ‘n skool – Dit is ‘n
familie!

Ons is opgewonde om 2025 in te gaan met die wete dat ons tot alles in staat is deur die genade wat ons uit die Vader se hand ontvang. Dit is, en sal altyd die belangrikste pilaar wees waarop ons skool gebou is – ons Geloof. Die waardes wat ons skool nastreef is Liefde, Lojaliteit, en Passie. Liefde vir ons Vader, ons Taal en ons skool – hieruit spruit die ander twee. As daar lojaliteit teenoor jou skool is, sal jy lief wees vir jou vriende, die tradisies wat jy saam beleef – die Passie wat jy beleef as dit goed gaan – die hartseer as ons mekaar ondersteun in moeilike tye – dit is wat karakter bou.

Ons roem ons by die Hansies daarop dat ons beginselvaste gebalanseerde jongmense die wêreld instuur. Mense wat weet wat dit is om hard te werk – saam te werk en kind te wees. Ons is bevoorreg om aktiwiteite binne en buite die klaskamer aan te bied wat elke leerling se behoeftes aanspreek. Fasiliteite wat met die beste in Limpopo en met Genade van Bo, eersdaags in Suid-Afrika sal kan meeding. ‘n Goed gekwalifiseerde onderwyskorps, moderne rekenaarsentrums, ‘n akademiese en ‘n tegniese studierigting, met sentrums wat toegerus is om die praktiese aspekte van die tegniese vakke aan te bied. Ons is ook trots daarop dat ons in 2025 vir die eerste keer Landboutegnologie as keusevak vir die Graad 10 leerlinge aanbied. Ons behaal in 2023 ‘n 100 % slaagsyfer in Graad 12 en word gereeld vereer op Distrik, en Provinsiale vlak vir ons akademiese prestasies. Op kultuurgebied neem ons leerlinge aan toneel, debat, kunswedstryde en redenaars deel – ons spog met die Top 10 redenaar in Suid-Afrika, Issebelle de Beer, die hoofdogter van 2024 in ons geledere. So ook die 3de plek in toneel en algehele 1ste plek in redenaars in die Bosveld Interhoër.

Dan natuurlik op sportgebied, leef die Hansies hul ten volle uit. Hansies neem kompeterend aan 14 verskillende sportkodes deel. Ons word in 2024 as die algehele wenners van die Bosveld Interhoër gekroon. Verskeie van ons atlete presteer op
provinsiale en nasionale vlak. Dit alles is slegs moontlik onder leiding van ‘n bekwame span afrigters en organiseerders. Die fasiliteite is van hoogstaande gehalte – ons het pas die netbalbane herstel, spog met ‘n tartan atletiekbaan en bied jaarliks
die Elardus Erasmus Gedenkbyeenkoms, een van die hoogtepunte op die SA Skole atletiek-kalender aan. Die Mauritz Hansen rugbyweek, wat jaarliks in April aangebied word, is in getalle die grootste rugbyweek ter wêreld.

Soos u kan sien is Hansieland, ‘n besige wêreld – ‘n plek waar jy wil wees! Kom raak betrokke. As jou bloed eenmaal blou geklop het, sal jy nooit op ‘n ander plek wil wees nie. 2025 gaan ‘n groot jaar wees – Kom beleef dit saam met ons!

​

Mnr Rinus de Jager

Hoof van Hoërskool Hans Strijdom